Lirë, shpejt dhe praktike
Përpos preparateve kozmetike, nga përbërësit natyrorë mund të përgatitni edhe, psh. zbutës natyror për rroba. Zbutësit industrialë për rroba zakonisht janë të dëmshëm, sidomos për fëmijët. Në vend të tyre, merrni një gotë ujë dhe qitni pesë pika vaji eterik të mentës. Një preparat i tillë i dezinfekton dhe freskon rrobat. Apo, ja një recetë e mrekullueshme për përgatitjen e shamposë natyrore. Në barnatoret bujqësore mund të gjeni bazën e shamposë, pastaj duhet të zieni çaj jeshil dhe ta shtoni në bazën e shamposë. Ky shampo natyror preferohet për forcimin e flokëve. Nëse keni probleme me zbokth, atëherë në bazën e shamposë duhet të shtoni një lugë të ndonjë vaji bimor, si psh vaj të jojobës. Gjithmonë mund të shtoni vajra eterike sipas shijes dhe dëshirës suaj. Gjatë dimrit më së shpeshti vjen deri te ftohja, gripi dhe infektimet tjera me viruse. Ka punëtori të specializuara që, me përdorimin e vajrave eterike, mund të bëjnë ilaçe të natyrshme që me sukses mjekojnë këto sëmundje.
Ja edhe një recetë për bërjen e qumështit nga tërshëra.
Merreni një grusht tërshërë dhe një litër ujë, përzieni me mikser elektrik. Pastaj kullojeni mirë këtë masë. Fundërrina që mbetet është e mrekullueshme si maskë për fytyrë, kurse pjesa e lëngshme paraqet një lloj të mrekullueshëm të qumështit natyror, për të cilin disa thonë se është më i mirë sesa qumështi i lopës.