“E kemi ditur se duhet të bëjmë një punë të pabesueshme për të përmbysur epërsinë nga ndeshja e parë, por Mançester Junajtedi e filloi furishëm ndeshjen dhe që në nismë shënoi gol. Sinqerisht, kam besuar në kualifikim pas ndeshjes së parë dhe këtë e kam bazuar në lojën që kemi treguar në ‘San Siro”, ka thënë Leonardo, duke shtuar:
“Mirëpo hasëm në një skuadër e cila e kishte mbrëmjen e saj dhe e cila ka shumë talente që kanë dëshirë të madhe për t’i dëshmuar vlerat e tyre. Megjithatë, rezultati përfundimtar i kësaj ndeshjeje ishte pasojë e rënies së moralit tonë kur rivali shënoi golin e epërsisë, pasi ishim të vetëdijshëm se na duheshin tre gola për të kaluar më tej.
Nuk dua ta fsheh faktin se suksesi në Ligën e Kampionëve ishte njëra nga ambiciet tona, kurse përjetuam humbje dhe atë humbje të rëndë nga një skuadër e cila po ashtu është pretendente e madhe për titull. Përveç kësaj, Mançester Junajtedi është edhe në formë të shkëlqyeshme”.
Ndërkaq sa i përket shishes së verës që e mori si dhuratë nga Fergusoni pas ndeshjes, trajneri i Milanit nënvizoi: “Për shkak të humbjes ajo do jetë me shije të hidhur. Por, fatkeqësisht futbolli është i tillë, dikush duhet të fitojë e dikush të humb. Me rëndësi është miqësia, ‘fair-play’ dhe të pranosh se në një ditë dikush ishte më i mirë se ju”.