Për të gjashtin vit radhazi Reali i Madridit është përshëndetur nga Liga e Kampionëve në 1/8 e finales. Kapiteni i “klubit mbretëror”, Guti nuk e ka fshehur zhgënjimin e madh pas eliminimit nga Lioni.
“Dëm i madh, edhe një herë treguam se në ndeshjet e mëdha nuk e kemi forcën e duhur për të bërë diferencën. Nuk mund të bëjmë justifikime. Është dashur të luajmë më shumë kolektivisht, e jo të bazohemi në individë. Kjo vlen sidomos për pjesën e dytë, në të cilën nuk luajtëm si duhet”, ka thënë Guti, duke shtuar:
“Lioni filloi të sulmojë në atë moment kur e kuptojë se ne nuk po i bëjmë presion si në pjesën e parë. Ky ishte momenti kur ne nuk luajtëm lojë kolektive. Tani nuk na mbetet tjetër gjë, veçse të përqendrohemi në garën për titull kampioni në ligën spanjolle, sepse ai është trofeu i vetëm që na ka mbetur për ta fituar”.