Janë lokalizuar e arrestuar nga policia italiane edhe tre shqiptarë të tjerë të dyshuar si anëtarë të grupit që trafikoi pak ditë më parë një sasi të konsiderueshme marijuane në brigjet e Leçes. Sasia e drogës prej rreth 600 kilogramësh, e ndarë në 20 çanta, do të sillte vlerën e 1 milionë eurove pas shitjes. Policia ka bërë të mundur kapjen e tre personave në superstradën Leçe-Brindisi. Në operacionin e kryer pak ditë më parë në brigjet italiane, agjentët e “Guardia di Finanza” arrestuan një 30-vjeçar shqiptar, Elton Kovaçi, i cili ndryshe nga bashkëkombasit e tij nuk arriti të arratisej. Ndër të tjera, hetuesit kanë dalë në përfundimin se organizata kishte në zotërim edhe armë.