Këshilla dhe sugjerime për sa i përket konsumimit të drejtë të produkteve ushqimore gjatë stinës së nxehtë të verës.
Me ardhjen e stinës së verës lindin disa pyetje si:
çfarë ushqimesh duhen konsumuar, çfarë lëngjesh duhen konsumuar?
A ekzistojnë ushqime të cilat nxijnë lëkurën? A duhen bërë dieta drastike etj.
Gjatë verës ngrënia e njeriut varet nga disa kushte në të cilat ndodhet organizmi në këtë stinë,si ,oreks i ulur, etje e madhe , gjëndje këputjeje dhe ulje e aftësisë tretëse.
Lëkura ndihmon organizmin në eliminimin e toksinave . Për të ndihmuar mbrojtjen natyrale të lëkurës, flokëve, thonjve, apo dhe kundër “stresit nga dielli” disa faktorë ushqyes apo ushqime nuk duhet të mungojnë në tavolinë .
Dietat e varfëra me elementë ushqyes apo me pak kalori para se të shkohet në plazh ndikojnë negativisht në lëkurë ,flokë ,thonj duke i bërë ato më të thata,flokët bien më shpejt, etj, ndaj Jo dieta drastike.

Edhe në verë dieta duhet të jetë e shëndetëshme e ekuilibruar, por me më pak kalori, dhe e pasuruar me ujë dhe kripëra minerale.
Kush janë faktorët ushqyes apo ushqimet që nuk duhet të mungojnë në tavolinë ?
Ushqimet që rekomandohen në stinën e verës janë zarzavatet dhe frutat, bishtajat, apo ato ushqimet që konsumohen në verë duhet të jenë të pasura me proteina, vitamina antioksidante, betakarotenoidet, Vitamina PP, kripëra minerale
Proteinat në formën e aminoacideve kryesore (Fenilalanina, metionina, leucina, izoleucina, lizina, valina, treonina, triptofani), janë të rëndësishëme mbasi sjellin energji në organizëm, rigjenerojnë indet dhe qelizat e organizmit. Aminoacidet kryesore ndodhen tek mishi, peshku, bishtajat .
Vitaminat antioksidante A, C, E, parandalojnë plakjen e parakohshme të lëkurës, lejojnë thithjen e betakarotenit dhe marrin pjesë në ripërtëritjen e epidermës. Vitamina A, antioksidanti më i rëndësishëm për shëndetin dhe bukurinë e lekurës, ndodhet në ushqime me origjinë shtazore si qumështi, djathrat.

Vitamina C, merr pjesë në formimin e kolagenit, siguron elasticitetin dhe ka efekt antioksidant. Gjëndet në agrume, brokoli,lakra, luleshtrydhe, kiwi, speca, domate, rradhiqe, spinaq. Vitamina E, ndihmon shumë në mbrojtjen e dëmeve nga rrezet ultraviolet dhe shpesh shtohet në kremrat mbrojtës. Gjendet në vajrat vegjetale, vaj luledielli, misri, ulliri por edhe në lajthi, arra, bajame, etj .
Betakarotenoidet janë antioksidantë por edhe nxisin prodhimin e melaninës, pigmentit përgjegjës për ngjyrën e lëkurës. Konsumimi i karrotave apo zarzavateve të pasura me vitamin A ose betakorreten bën që të depozitohen disa ngjyrues në lëkurë të cilët duke u bashkuar me melaninën e shton ngjyrimin e lëkurës. Karotenoidet nëse organizmi ka nevojë i kthen në Vitaminë A. Karotenoidet ndodhen në ushqimet bimore si kajsi, brokoli, karrota, hurma, sallatë jeshile, pjepër, domate, spinaq, kungull dhe speca të kuq.
frutat dhe zarzavatet janë të mirëpritura në verë për freskinë e tyre, për vlerat kalorike modeste dhe kënaqësinë që i japin organizmit.
Por, duhet të kini parasysh se ushqimet që përmbajnë këto vitamina duhen ngrënë të gjalla mbasi të skuqura humbasin vlerat e tyre dhe mund të bëhen të dëmshme .
Ushqimet që përmbajnë Vitamina PP, qetësojnë skuqjet e shkaktuara nga djegiet. Gjendet në kikirikë, mishin e kuq, mëlçi, karkaleca, peshk ton, shpatë, vezë.
Mikroelementët, sidomos Hekuri, i cili bën lidhjen e oksigjenit me hemoglobinen, Zinku, ka rol mbrojtës të organizmit, Jodi, element kryesor për funksionin e tiroides, Seleni i cili ka funksion antioksidant. Ndodhen në prodhimet e detit , legumet, zarzavatet, mishin, maja birre, vezë, senap, gruri i fortë, etj.
Ushqimet që rekomandohen janë: bukë dhe makarona me miell të plotë (të zeza) qumësht, djathra, mish të bardhë, peshk dhe produkte deti, vaj ulliri, zarzavate, bishtaja, fruta.
Mishrat e preferuar janë: mishi i bardhë si: pulë, lepur, gjel deti, ose peshk. Evitoni salcat pikante apo të skuqurat .Yndyrnat shtazore nuk preferohen për kaloritë e larta që kanë dhe vështirësinë e tretjes së tyre.
Pini në mënyrë të bollshme : ujë, çajra, lëngje të ferskëta frutash, lëng domatesh të freskët, karrotash të freskët.
Redukto përdorimin e ujit shumë të ftohtë, lëngjeve të gazuara, aperitivë e pije alkoolike. Vera dhe birra duhen konsumuar vetëm në sasi të vogla gjatë ngrënies mbasi shtojnë djersën dhe etjen.
Redukto ose elimino:sheqernat, yndyrnat shtazore, mishin e kuq, të skuqurat, ushqimet e konservuara, pikantet, kafe, etj.
Sheqernat zgjidhen sipas vlerës maksimale ushqyese, energjike dhe tretëse. Rekomandohen buka, makaronat, oriz të plotë, më shumë i preferueshëm orizi, elbi.